Drejtoria Vendore e Agjencisë Shtetërore të Kadastrës (ASHK) Shkodër po vijon punën në njësitë administrative Gradec, Reç, Ktosh dhe Pjetroshan, për procesin e kalimit të tokës bujqësore nga përdorimi në pronësi, si dhe në bashkinë e Malësisë së Madhe.

Kadastra bën të ditur se, gjatë verifikimeve është evidentuar nevoja për plotësimin e disa kërkesave nga ana e qytetarëve. Për këtë arsye, ASHK fton banorët e këtyre zonave të paraqiten pranë Drejtorisë Vendore ASHK Shkodër për kontrollin e dokumentacionit të dorëzuar dhe për plotësimin e dosjeve me dokumentet e munguar.

Bashkëpunimi i banorëve është thelbësor për vijimin e procesit, garantimin e dosjeve të sakta dhe koordinimin me institucionet përkatëse, me qëllim përmbylljen e procedurave në kohë.

Banorët e fshatrave Gradec, Reç, Ktosh dhe Pjetroshan, emrat e të cilëve janë publikuar në faqen zyrtare të ASHK-së, mund të konsultojnë listën orientuese dhe të informohen mbi dokumentacionin e nevojshëm për plotësimin e dosjes në këtë link: https://www.ashk.gov.al/…/kalimi-i-tokes-bujqesore-nga…/

Shqyrtimi i dosjeve do të nisë menjëherë pas plotësimit të tyre me dokumentacion të rregullt dhe të plotë nga subjektet përkatëse. ASHK njofton se, ky proces po zbatohet në përputhje me Ligjin 2020, “Për përfundimin e proceseve kalimtare të pronësisë në Republikën e Shqipërisë”, që përcakton kriteret për kalimin e tokës bujqësore nga përdorimi në pronësi, pa shpërblim, për kërkesat e paraqitura brenda afatit ligjor.

Burimi ATSH