Kryeministri Edi Rama deklaroi sot, gjatë konferencës së fundvitit me gazetarët, se është kërkuar një marrëveshje me Komisionin Europian që gazetarët të mos ndiqen më penalisht për shpifje.

“Unë kam kërkuar marrëveshje me Komisionin Europian që për gazetarët të mos ketë më ndjekje penale për shpifje. Ju shpifni sepse, po nuk shpifët, nuk i duheni atij që ju punëson”, u shpreh Rama, duke shtuar se shpesh përdoren gjysmë të vërteta, të cilat vendosen brenda një historie dhe për këtë arsye duken të besueshme.

Kryeministri theksoi se problemi qëndron tek fakti që të vërtetat nuk bëjnë spektakël dhe nuk prodhojnë zhurmë publike.

“Të thuash që Shqipëria është e para në rajon për transparencën dhe eficiencën e prokurimeve publike, siç e thotë SIGMA, është diçka e mërzitshme. Ndërsa të thuash që Shqipëria është vendi më i korruptuar në botë, sepse kështu ka thënë dikush në Uashington, kjo është spektakolare dhe për këtë arsye perceptohet si më e besueshme”, tha Rama.

Duke folur për realitetin në vend, Rama deklaroi se Shqipëria ka sot shumë më pak korrupsion sesa ka pasur më parë. Sipas tij, rastet e qytetarëve që kanë paguar para për të marrë një shërbim janë ulur minimalisht me 95%, pasi rreth 95% e shërbimeve sot ofrohen pa kontakt me administratën.

Ai theksoi se këto zhvillime nuk dëshmojnë një Shqipëri të korruptuar, por një Shqipëri që është në luftë me korrupsionin dhe që ka hapur të gjithë kapitujt e negociatave për anëtarësim në Bashkimin Europian pikërisht sepse ka bërë këto reforma.

Marrë nga ATSH