Kryetari i Kontrollit të Lartë të Shtetit (KLSH), Arben Shehu priti në një takim pune auditorin e përgjithshëm të Zyrës Shtetërore të Auditimit të Maqedonisë së Veriut, Maksim Acevski, i shoqëruar nga delegacioni zyrtar i institucionit.

Në përbërje të delegacionit ishin zëvendësauditori i përgjithshëm, Orhan Ademi, këshilltarja Tanja Janevska dhe audituesja Hristina Dabeska.

Gjatë takimit, Shehu dhe Acevski vlerësuan bashkëpunimin e deritanishëm ndërmjet dy institucioneve të auditimit më të lartë, duke theksuar rëndësinë e forcimit të partneritetit dhe shkëmbimit profesional.

Të dy drejtuesit nënvizuan se auditimet paralele mbeten një nga format më të efektshme të bashkëpunimit, duke qenë se trajtojnë tematika me ndjeshmëri të lartë publike dhe ndikim të drejtpërdrejtë në funksionimin e institucioneve dhe shërbimeve për qytetarët.

Përfaqësuesit e KLSH-së dhe Zyrës Shtetërore të Auditimit të Maqedonisë së Veriut shprehën angazhimin për vijimin e projekteve të përbashkëta dhe zgjerimin e tyre, me qëllim rritjen e transparencës dhe përgjegjshmërisë në administratën publike.

/Marrë nga ATSH