Ministrja e Punëve të Brendshme, Albana Koçiu deklaroi se për shkak të motit të keq që pritet të ditët në vijim, duhet të ketë një koordinim maksimal ndërinstitucional mes strukturave vendore.

Ministrja Koçiu e bëri këtë deklaratë sot gjatë një takimi, ku të pranishëm ishin edhe zëvendëskryeministrja, njëherazi ministre e Infrastrukturës dhe Energjisë, Belinda Balluku, ministri i Mbrojtjes Pirro Vengu, ministri i Bujqësisë dhe Zhvillimit Rural Andis Salla, kreu i Agjencisë Kombëtare të Mbrojtjes Civile Haki Çako, si edhe prefektë dhe kryetarë bashkish në vend.

Koçiu tha se prefektët gjatë këtyre ditëve duhet që të perfeksionojnë koordinimin ndërinstitucional akoma më shumë, për shkak të situatës që pritet me motin e keq.

“Do t’ju ftoja, sidomos zonat me risk, të jenë në gatishmëri dhe të koordinohen sa më mirë me institucionet vendore, duke pasur parasysh të gjitha ato çështje që në rast reshjesh të shtuara janë prezente, duke nisur me rrjetin e kanalizimeve, kanalet kulluese, duke raportuar çdo problematikë në kohë reale”, tha Koçiu.

Ministrja Koçiu kërkoi një bashkëpunim më të ngushtë të prefektes së re të qarkut Shkodër me kryetarin e bashkisë, Benet Beci, pasi të dyja strukturat kanë eksperiencën e mjaftueshme për t’ia dalë me sukses.

Burimi ATSH