Ministrja e Shëndetësisë dhe Mirëqenies Sociale, prof. Evis Sala, pas mbledhjes së përbashkët të qeverive mes Shqipërisë dhe Italisë tha, se marrëveshja e nënshkruar sot me qeverinë italiane në fushën e Neonatologjisë në Shqipëri, përfshin grantin e qeverisë italiane për të mbështetur këtë shërbim, si një investim për të ardhmen.

“Patëm një takim shumë të rëndësishëm me homologun dhe kolegun, ministrin Orazio Schillaci, ku kemi rakorduar bashkëpunimin për ngritjen e Rrjetit Kombëtar të Onkologjisë, por edhe për Institutin Kombëtar të Onkologjisë në Tiranë, një bashkëpunim strategjik që vë bazat për të gjithë programin e ripërtëritjes së onkologjisë në Shqipëri. Një fushë tjetër shumë e rëndësishme që është e lidhur ngushtësisht me onkologjinë është edhe ajo e diagnostikës, dhe ky është një tjetër fokus që kemi në bashkëpunimin dhe në bisedat që bëmë sot me homologun Schillaci”, tha ministrja Sala.

Në pr.buxhetin e vitit 2026, qeveria shqiptare ka parashikuar një fond të posaçëm për barnat antitumorale, në funksion të përmirësimit të trajtimit për pacientët onkologjikë.

“Ky fond mundëson futjen e barnave të reja dhe gjithashtu rritjen e shumëllojshmërisë së indikacioneve për t’i përdorur këto barna, në funksion të një cilësie më të mirë të trajtimit për pacientët”, bëri të ditur ministrja Sala.

Ndërkohë, Këshilli i Ministrave miratoi dje vendimin për alokimin e fondit prej 200 milionë lekësh, për nevojat urgjente të Qendrës Spitalore Universitare “Nënë Tereza” për barnat.

Burimi ATSH