Presidenti amerikan, Donald Trump tha sot në takimin e Bordit të Paqes, se disa vende kishin rënë dakord të kontribuonin me trupa për të “stabilizuar” Gazën, sipas “NBC News”.

Presidenti i SHBA-së tha se Indonezia, Maroku, Shqipëria, Kosova dhe Kazakistani kishin angazhuar të gjitha trupat për të stabilizuar Gazën.

Trump shtoi se vende të tjera, si Egjipti dhe Jordania, po ofronin gjithashtu ndihmë të konsiderueshme, për të krijuar një forcë policore palestineze shumë të besueshme.

Pjesëmarrësit në takimin e Bordit të Paqes janë mbledhur sot në Institutin Amerikan të Paqes, sipas “NBC News”.

Takimi filloi me një foto të të pranishmëve, ku presidenti amerikan, Donald Trump ishte i shoqëruar nga sekretari amerikan i Shtetit, Marco Rubio, shefja e stafit të Shtëpisë së Bardhë Susie Wiles, zëvendëspresidenti JD Vance dhe dhëndri i Trump, Jared Kushner, një anëtar i bordit ekzekutiv të organizatës.

Trump bëri një shaka ndërsa të gjithë pjesëmarresit pozuan, duke pyetur nëse të tjerët po e shijonin muzikën që luhej në sfond.

Ndërsa pjesëmarrësit, përfshirë udhëheqës të huaj dhe zyrtarë të administratës Trump, zunë vendet e tyre pas podiumit, disave iu dhanë kapele të kuqe në stilin MAGA me mbishkrimin “SHBA” me shkronja të mëdha të bardha.

Trump ka hapur takimin me një fjalim drejtuar pjesëmarrësve, të cilët po mblidhen për t’u përqendruar në të ardhmen e Gazës. Përfaqësues të dhjetëra vendeve pritet të marrin pjesë në program.

Burimi ATSH