Ministri i Financave, Petrit Malaj deklaroi sot se programi IPARD III pritet të hapet gjatë vitit 2026, pas përmbushjes së masave të kërkuara nga Komisioni Europian.

Gjatë prezantimit të projektbuxhetit për vitin 2026 në Komisionin për Bujqësinë, Ushqimin dhe Zhvillimin Rural, Malaj theksoi se programet IPARD kanë qenë të suksesshme në fazat e mëparshme, pavarësisht disa parregullsive të konstatuara në fazën e dytë.

“IPARD është një skemë e suksesshme që ka ndihmuar zhvillimin e bujqësisë shqiptare. Për shkak të disa parregullsive të identifikuara në fazën e dytë, Komisioni Europian përmes DG AGRI kërkoi përmbushjen e disa masave nga qeveria shqiptare. Këto masa janë në proces përmbushjeje dhe jam shumë optimist se IPARD III do të hapet gjatë vitit 2026”, deklaroi ministri Malaj.

Ministri theksoi gjithashtu se, pavarësisht vonesave në financimin nga IPARD, qeveria shqiptare ka vendosur mekanizma alternativë për mbështetjen e fermerëve dhe bizneseve bujqësore.

“Është vendosur një garanci sovrane prej 30 milionë eurosh për sektorin bujqësor, që u mundëson fermerëve dhe bizneseve të vogla të përfitojnë kredi të garantuara nga shteti deri në 70% të vlerës, me normë interesi prej vetëm 2%. Paralelisht, është krijuar edhe një linjë kredie prej 250 milionë eurosh, me norma të lehtësuara interesi, e vënë në dispozicion nga Banka e Shqipërisë, për të nxitur zhvillimin e sektorit të agropërpunimit, që do të jetë një nga prioritetet e qeverisë në vitet e ardhshme”, tha Malaj.

Qëllimi, shtoi ai, është t’i japim më shumë vlerë produkteve bujqësore shqiptare dhe të mbështesim zinxhirin e plotë të prodhimit dhe përpunimit.

Burimi ATSH