Kreu i Inspektoratit Kombëtar të Mbrojtjes së Territorit, Afrim Qëndro zhvilloi sot një takim me Shoqatën e Ndërtuesve.

Gjatë takimit palët u dakordësuan të fillojnë një fazë të re bashkëpunimi përmes institucionalizimit të tryezës së përbashkët si një platformë periodike ndërveprimi.

Qëndro i informoi anëtarët e Shoqatës së Ndërtuesve për reformën e re të inspektorateve, si dhe dëgjoi me vëmendje edhe shqetësimet e tyre.

“Inspektorati Kombëtar i Mbrojtjes së Territorit nuk ka si prioritet parësor ndëshkimin, por parandalimin. Gjobat nuk janë qëllim në vetvete, por një mekanizëm që vihet në lëvizje vetëm pasi subjektet nuk reflektojnë në përmbushjen e detyrimeve ligjore brenda afateve të përcaktuara”, tha Qëndro, në një postim në rrjetet sociale.

Sipas tij, IKMT do të jetë i angazhuar të mos tolerojë asnjë shkelje që cenon ose bie në kundërshtim me lejet e miratuara, por veçanërisht me kërkesat teknike të sigurisë.

Qëndro i inkurajoi që, në çdo rast, të denoncojnë çdo sjellje arbitrare dhe joetike të punonjësve të IKMT-së, duke i garantuar se ankesat do të shqyrtohen me kujdes dhe do të merren masat përkatëse sipas rastit specifik.