Drejtori i ri i përgjithshëm i Postës Shqiptare, Etjen Xhafaj deklaroi sot se prioriteti i punës së tij do të jetë përmirësimi i shërbimeve ndaj qytetarëve dhe rritja e efikasitetit në çdo hallkë të institucionit.

Xhafaj u prezantua sot nga zëvendëskryeministrja dhe njëherësh ministre e Infrastrukturës dhe Energjisë, Belinda Balluku, në krye të Postës Shqiptare.

“Posta është shërbimi më afër qytetarëve të Shqipërisë. Me mbi 2500 punonjës, duhet të jemi shumë më të ndjeshëm ndaj çdo individi, veçanërisht ndaj atyre që kanë më shumë nevojë. Shërbimi ndaj publikut duhet të jetë prerogativa e parë e çdo punonjësi, duke nisur nga unë”, u shpreh Xhafaj.

Ai vuri në dukje se puna e tij do të fokusohet në forcimin e rolit të Postës si institucion i besueshëm dhe efikas.

Sipas tij, shërbimet duhet të jenë më të shpejta, më të aksesueshme dhe të shpërndahen më gjerësisht, në mënyrë që të justifikohet besimi i qytetarëve.

“Duhet të garantojmë që çdo shërbim të arrijë kudo, me cilësi dhe përgjegjshmëri”, nënvizoi ai.

Në fjalën e tij, Xhafaj u ndal edhe te rëndësia e inovacionit, duke e cilësuar këtë periudhë si një moment vendimtar për Postën Shqiptare.

“Shumë institucione publike në vend janë tashmë në nivele të krahasueshme me ato të vendeve të Bashkimit Europian. Edhe Posta duhet të ecë me të njëjtin ritëm. Duhet të jetë primare për ne të inovojmë. Kjo është një garë idesh dhe jemi të hapur ndaj çdo risie, si nga të rinjtë, ashtu edhe nga ata që kanë përvojë në këtë institucion dhe dinë të masin pulsin e shërbimit, qoftë të postës universale, qoftë të shërbimeve financiare, për të arritur maksimizimin e tyre, që janë mjete kyçe për funksionimin e institucionit”, deklaroi ai.

Burimi ATSH