Kryeministri Edi Rama ndau në rrjetet sociale pamje nga puna në Galerinë Kombëtare të Arteve, e cila do të transformohet në Muzeun Kombëtar të Arteve të Bukura.

“Vijon puna për rilindjen e Galerisë Kombëtare të Arteve në Muzeun Kombëtar të Arteve të Bukura, një investim që parashikon dyfishimin e hapësirave ekspozuese, një laborator të avancuar restaurimi dhe zgjerimin e hapësirave të ruajtjes, duke garantuar mbrojtjen dhe sigurinë e thesareve artistike”, shkroi kryeministri Rama.

Projekti përfshin gjithashtu aksesueshmërinë me dy hyrje të reja, sistem sigurie të avancuar, shkallë emergjence dhe sisteme HVAC për ruajtjen e veprave në kushte optimale.

Ndërkohë më herët, ministri i Turizmit, Kulturës dhe Sportit, Blendi Gonxhja, e ka cilësuar projektin, si një transformimin epokal të GKA-së.

Rikonstruksioni i Muzeut Kombëtar të Arteve të Bukura nisi në fund të vitit 2021, për shkak të dëmtimeve që pësoi nga tërmeti i fortë që goditi vendin nëntorin e 2019-ës. Pas transformimit, Muzeu Kombëtar i Arteve të Bukura do të jetë një qendër moderne që do të përfaqësojë me dinjitet trashëgiminë kulturore, krijimtarinë dhe potencialin bashkëkohor të artit pamor shqiptar.

Në krye të galerisë është emëruar Adela Demetja, drejtoresha e parë grua në historinë e institucionit, një hap domethënës drejt përfaqësimit të barabartë gjinor në drejtimin e institucioneve kulturore, si dhe një sinjal i qartë për integrimin e zërave të skenës së pavarur në rrëfimin institucional të artit në Shqipëri.

Burimi ATSH