Presidenti Bajram Begaj tregoi sot në një intervistë televizive bisedën që shkëmbeu gjatë takimit me Presidentin e SHBA-së, Donald Trump, gjatë vizitës së tij të fundit në SHBA ku kryesoi delegacionin shqiptar në punimet e Asamblesë së Përgjithshme të OKB-së.

Begaj u shpreh se ishte moment krenarie, kur presidenti Trump i pohoi në anglisht “Albania is doing great job”, (Shqipëria po bën një punë të shkëlqyer).

Gjatë Asamblesë u organizua dhe pritja nga Presidenti Trump dhe zonja e parë e Shteteve të Bashkuara të Amerikës, ku morën pjesë kryetarët e shteteve dhe kryetarët e qeverive ku i pranishëm ishte dhe Presidenti Begaj.

“Kur takon presidentin Trump është gjithmonë kënaqësi dhe emocion. Por ai moment i takimit mendoj se vlen më shumë më shumë së gjithçka tjetër kur presidenti Trump të flet në anglisht dhe të thotë se ‘Albania is doing great job’”, u shpreh Begaj.

Kreu i shtetit tha se kjo shprehje e ka bazën te marrëdhëniet strategjike dhe miqësia e hershme mes dy vendeve.

“Nën administratën Trump raportet midis SHBA dhe Shqipërisë për sa i përket bashkëpunimit sidomos në fushën ekonomike do të forcohen”, tha Begaj.

“Mendoj që fushat me interes të ndërsjellë siç mund të jete ekonomia e lidhur me turizmin apo e lidhur me energjinë apo marrëdhëniet në fushën ushtarake do të njohin njohje të reja dhe avancim të mëtejshëm”, theksoi Begaj.

Burimi ATSH