“Ministria e Drejtësisë është një nga vatrat e aktivitetit të Inteligjencës Artificiale, qoftë me transferimin e korpusit ligjor të BE-së në korpusin ligjor të Republikës së Shqipërisë, i cili falë Diellës po zhvillohet me një shpejtësi të panjohur me këtë proces”, u shpreh sot Kryeministri Edi Rama gjatë prezantimit tëe ministrit të ri të Drejtësisë, Besfort Lamallari.

Rama kujtoi se Kroacisë, e cila faktikisht shkëlqeu në procesin e negociatave, iu deshën 7 vjet për të bërë punën që Diella po e bën për më pak se dy vjet.

Kryeministri Rama konstatoi se diferenca është kaq e thjeshtë dhe u kërkoi angazhim të fortë për ta çuar Inteligjencën Artificiale në çdo skaj të aktivitetit paralelisht me transferimin ligjor të BE-së që na jep mundësinë për të qenë kaq ambiciozë për të mbyllur negociatat në 2027.

Rama vuri në dukje se “përveç reformave, angazhimeve dhe gjithë rezultateve të ne njerëzve, na duhet Inteligjenca Artificiale sepse fizikisht do të ishte e pamundur që 4 mijë e disa qindra ligje e akte nënligjore të nevojshme për plotësimin e kushteve teknike t’i bënim me përkthyes dhe me juristë njerëz. Një armatë të tërë me të tillë ka angazhuar Kroacia dhe një armatë me të tillë kanë angazhuar të gjitha vendet”.

Ndërkohë, shtoi Rama, që ne përkthyesit e juristët i kemi për të kontrolluar çfarë bën Diella.

“Çdo ditë puna e Diellës bëhet më cilësore sepse modeli i Inteligjencës Artificiale është ky sa më shumë fut aq më shumë mëson dhe nuk harron asgjë. Nuk i ndërhyn askush nuk ia prish humorin asnjë, nuk fle gjumë, nuk thotë po shkoj të ha ose më hahet prandaj s’po punoj”, tha Rama.