Kryeministri Edi Rama, njëherësh kryetar i Partisë Socialiste vlerësoi sot se Niko Peleshi është profili i duhur për të drejtuar Kuvendin e Shqipërisë.

Gjatë fjalës në Asamblenë Kombëtare të Partisë Socialiste, Rama theksoi drejtimet dhe sfidat që presin Kuvendin.

Rama vuri në dukje se nënkryetare e Kuvendit do të jetë deputetja e Durrësit Klodiana Spahiu.

Rama njoftoi po ashtu edhe drejtimin e grupit parlamentar të PS-së, i cili do t’i lihet Taulant Ballës.

“Unë besoj se pas kaq vitesh eksperiencë në drejtimin e një sërë institucionesh dhe profilin e respektuar gjerësisht, Niko Peleshi është profili dhe njeriu i duhur për të marrë nga Elisa Spiropali stafetën si kryetari i ri i Kuvendit të Shqipërisë. Kam besim se në krah me eksperiencën e fituar dhe për profesionalizmin, integritetin dhe shembullin, deputetja e Durrësit Klodiana Spahiu është nënkryetarja e duhur për Kuvendin e ri”, tha Rama.

Ndërsa për kreun e grupit parlamentar të PS-së, Rama tha se “ka shumë pak për të menduar pasi Taulant Balla mund të jetë drejtuesi i duhur për eksperiencën e gjatë si deputet, njohjen e detyrës dhe të grupit më mirë se kushdo”.

Burimi ATSH