Kryeministri Edi Rama zhvilloi sot një takim me Komandantin e Forcave Detare të Shteteve të Bashkuara në Europë dhe Afrikë, Admiralin Stuart B. Munsch. Në takim kreu i qeverisë u shoqëronte edhe nga Ministri i Mbrojtjes Pirro Vengu. Po ashtu e pranishme ishte dhe e ngarkuara me Punë në Ambasadën amerikane në Shqipëri Nancy VanHorn.

Kryeministri bëri të ditur se takimi vjen në kuadër të hapave që Shqipëria po ndërmerr për rilindjen e industrisë ushtarake, si edhe për ecurinë e projekteve të Korridorit VIII dhe Portit të Ri të Durrësit.

Ambasada e Shteteve të Bashkuara të Amerikës ndau detaje nga takimi i zhvilluar mes kryeministrit Edi Rama dhe Admiraln Stuart B. Munsch.

Në njoftimin e Ambasadës së SHBA në Tiranë bëhet me dije se gjatë takimit u diskutua partneriteti i fortë në fushën e sigurisë midis Shteteve të Bashkuara dhe Shqipërisë, si edhe angazhimin e përbashkët ndaj Aleancës së NATO-s.

“Admirali Munsch e falënderoi Shqipërinë për angazhimin e vazhdueshëm në forcimin e aftësive logjistike të Aleancës së NATO-s përmes investimeve kombëtare në porte dhe infrastrukturë portuale, siç është Porto Romano”, njofton Ambasada e SHBA në Tiranë.

Në kuadër të rilindjes së industrisë ushtarake, Shqipëria po investon për prodhimin e uniformave dhe montimin e mjeteve të blinduara, transportuesve të artilerisë, zjarrfikëseve dhe autoambulancave.

Pak ditë më parë, kryeministri deklaroi në një intervistë televizive se do të prodhohen edhe dronë “Made in Albania”, që do të mbrojnë hapësirën ajrore të vendit, por edhe do të eksportohen.

Burimi ATSH