Portali qeveritar “e-Albania” ka vijuar të shënojë një rritje të qëndrueshme në përdorim, duke reflektuar digjitalizimin e gjithanshëm të shërbimeve publike në vend.

Sipas statistikave zyrtare për muajin gusht 2025, janë regjistruar gjithsej 31 550 488 transaksione në portalin “e-Albania”.

Numri i qytetarëve të regjistruar në portal ka arritur në 3 386 977 përdorues.

Sa i takon shërbimeve elektronike, në portalin “e-Albania” ofrohen 1262 shërbime.

Vetëm gjatë muajit gusht janë regjistruar 3 316 683 përdorues të këtyre shërbimeve. Ndërkohë që 894 860 qytetarë kanë marrë dokumente me vulë elektronike përmes portalit.

Këto të dhëna tregojnë qartë një rritje të vazhdueshme të aksesit dhe përdorimit të shërbimeve online si nga individët, ashtu edhe nga bizneset, duke ulur në mënyrë drastike nevojën për praninë fizike në sportelet e administratës publike.

Vula elektronike dhe verifikimi automatik i dokumenteve kanë sjellë një nivel të ri sigurie dhe prakticiteti për qytetarët dhe institucionet.

“e-Albania” është tashmë porta kryesore e komunikimit të qytetarëve me shtetin. Kjo rritje dëshmon për besimin në shërbimet dixhitale dhe për efikasitetin që sjell digjitalizimi në jetën e përditshme.

Portali vijon të përmirësohet, duke integruar shërbime të reja dhe duke lehtësuar aksesin për të gjitha grupmoshat, përfshirë edhe aplikacione të dedikuara për telefonat inteligjentë.

Burimi ATSH