Shkolla e mesme profesionale “Shën Jozefi Punëtor” në Rrëshen, një partneritet gjermano-shqiptar po hap rrugën për një edukim modern dhe praktik për të rinjtë që zgjedhin të ndjekin arsimin profesional.

Përfaqësues të ambasadës gjermane në Tiranë dhe përfaqësues të Dhomës Zejtare të Dortmundit vizituan shkollën e mesme profesionale “Shën Jozefi Punëtor” në Rrëshen, ndërsa vlerësuan këtë bashkëpunim si “hap të rëndësishëm për arsimin profesional”.

Falë këtij bashkëpunimi, arsimi në fushat e teknikës së automjeteve, elektroteknikës dhe punimit të metalit po ngrihet në një nivel tjetër. Të rinjtë në Shqipëri pajisen me aftësi praktike që janë shumë të nevojshme në ekonominë moderne.

“Dhe më e rëndësishmja: në vitin 2024, të gjithë të diplomuarit e këtyre programeve në shkollën “Shën Jozefi Punëtor” kanë gjetur një punë në profesion brenda 6 muajve pas përfundimit të arsimit”, thuhet në njoftimin për shtyp të Ambasadës gjermane në Tiranë.

Kjo konsiderohet një dëshmi e qartë se arsimi profesional cilësor jo vetëm që forcon kompetencat profesionale, por edhe hap drejtpërdrejt rrugën drejt një të ardhmeje të suksesshme profesionale.

“Vizita tregoi se sa të rëndësishme janë partneritetet ndërkombëtare për ndarjen e njohurive dhe promovimin e cilësisë profesionale në mbarë botën”, përfundon njoftimi për shtyp.

Burimi ATSH