Në Institutin e Shëndetit Publik vijojnë punimet për ndërtimin e korpusit modern të Laboratorëve të Referencës Kombëtare.

Ministrja e Shëndetësisë dhe Mbrojtjes Sociale, Albana Koçiu ndau në rrjetet sociale pamje nga punimet që po kryhen.

Koçiu tha se “në kantierin e korpusit të laboratorëve të referencës në Institutin e Shëndetit Publik vijon me ritëm të shpejtë puna për të trefishuar kapacitetet laboratorike’”

“Ky investim modern po ngre standardet e biosigurisë në përputhje me praktikat më të avancuara të BE-së, duke forcuar infrastrukturën laboratorike dhe duke garantuar monitorimit efikas të rreziqeve për shëndetin publik”, theksoi Koçiu.

Korpusi i laboratorëve të referencës kombëtare të Institutit të Shëndetit Publik po ndërtohet në një sipërfaqe prej 2900 m2 ku dhe i cili do ketë nivelin më të lartë të biosigurisë sipas standardeve të BE-së, ku trajtimi i agjentëve biologjikë me rrezik të lartë, bëhet në nivele më të larta mbrojtje për shëndetin e specialistëve, krahasuar me nivelin që aktualisht ka.

Laboratorët do të pajisen edhe me aparatura të teknologjisë së fundit dhe me kushte bashkëkohore pune për ekspertët dhe stafin e ISHP-së duke garantuar përgjigje sa më efektive, në kohë dhe të sigurta për shëndetin publik.

Burimi ATSH