Sot, punonjësit e Autoritetit për Informimin mbi Dokumentet e ish-Sigurimit të Shtetit iu përgjigjën ftesës së Qendrës Kombëtare të Transfuzionit të Gjakut, duke u bërë pjesë e seancës së dhurimit vullnetar të gjakut.

Në njoftim të Autoritetit të Dosjeve, thuhet se “ky ishte një gjest i thjeshtë, por me vlerë të jashtëzakonshme, një akt solidariteti që përçon mesazhin se çdo pikë gjaku mund të jetë një shpresë për jetë”.

“Falënderojmë të gjithë kolegët që kontribuan me ndërgjegje dhe përkushtim, duke e kthyer këtë thirrje në vepër konkrete për pacientët që kanë nevojë për ndihmë. Humanizmi nuk njeh detyrë, ai buron nga zemra”, thuhet në njoftim.

14 Qershori është Dita Botërore e Dhurimit të Gjakut, ndërsa kjo ditë vjen jo vetëm si një thirrje për ndërgjegjësimin ndaj nevojave për gjak të sigurt, por edhe si një falënderim për dhuruesit vullnetarë të gjakut.

Objektivat e fushatës për 2025 janë rritja e ndërgjegjësimit të publikut për nevojën kritike për dhurimin e gjakut dhe plazmës dhe ndikimin që ato kanë në jetën e pacientëve, inkurajimi i dhuruesve të rinj dhe ekzistues që të japin gjak rregullisht, nxjerrja në pah e ndikimit pozitiv të dhuruesve të gjakut në shëndetin dhe mirëqenien e të tjerëve nëpërmjet dhurimit të gjakut.

Burimi ATSH