Kryeministri Edi Rama falënderoi sot presidentin e Francës, Emmanuel Macron për mesazhin e urimit për fitoren në zgjedhjet parlamentare të 11 majit.

Përmes një mesazhi në platformën “X”, Rama u shpreh se falë qasjes së presidentit Macron ndaj Ballkanit Perëndimor, marrëdhëniet mes dy vendeve kanë arritur nivel të ri si kurrë më parë.

“Ju falënderoj nga thellësia e zemrës sime, i dashur Emmanuel për mesazhin tuaj të urimit që do të thotë shumë jo vetëm për mua, por edhe për marrëdhëniet mes Shqipërisë dhe Francës. Falë jush dhe qasjes suaj ndaj Ballkanit Perëndimor, këto marrëdhënie kanë arritur një nivel të ri si kurrë më parë”, u shpreh Rama.

“Është vërtet e mrekullueshme që Shqipëria ka nderin t’ju mirëpresë përsëri si një mik të çmuar me rastin e Samitit të Komunitetit Politik Europian dhe që ju do të qëndroni me ne më pas për të vlerësuar bashkëpunimin tonë të ngushtë. Mirë se erdhe, mik i dashur!”, shkruan Rama në platformën “X”.

Më herët, në një mesazh urimi për fitoren në zgjedhjet e 11 majit, presidenti Macron e siguron kryeministrin Rama se “Franca do të jetë gjithmonë në krah të Shqipërisë në rrugën e saj drejt Bashkimit Europian”.

Burimi ATSH