Drejtuesja politike e Partisë Demokratike për Diasporën, Jozefina Topalli u bëri thirrje qytetarëve që të votojnë dhe të mos nënvlerësojnë zërin e tyre.

Sipas saj, sot ata kanë mundësinë që të ushtrojnë të drejtën e tyre për të votuar, duke iu kujtuar atyre se votimi është edhe përgjegjësi.

“Kanë mbetur edhe 2-3 orë dhe fjala kyçe në të tilla raste është votoni, votoni, votoni. Mos nënvlerësoni zërin tuaj, ju keni një fuqi më të madhe nga sa mendoni. Dyert e votimeve janë të vetmet dyer që hapen vetëm një herë në katër vite. Ndaj hyni tek ajo derë. Votoni, sepse vota nuk është vetëm e drejtë, por edhe përgjegjësi”, tha Topalli.

Njëkohësisht Topalli falënderoi shqiptarët e diasporës që u regjistruan për të votuar, dhe ata që zgjodhën të kthehen në atdhe për të votuar.

“Ata përcollën mesazhin se ditën në të cilën vendi ka nevojë për ta, ata janë këtu”, deklaroi Topalli.

Burimi ATSH