Shqipëria do të presë për herë të parë nisjen e madhe të Giro d’Italia “Grande Partenza”, një nga turnetë më të famshëm çiklistikë në botë.

Kryeministri Edi Rama, njëherësh kryetar i Partisë Socialiste, në një videomesazh nga sheshi “Skënderbej” ku po bëhen përgatitjet e fundit për prezantimin pasditen e sotme të skuadrave pjesëmarrëse në ”Giro d’Italia Grande Partenza” vlerësoi rëndësinë e këtij eventi për vendin.

“Në sheshin ‘Skënderbej’ ku nga njëra anë po përgatitemi për të mikpritur gjithë Europën në 16 maj ndërkohë nga ana tjetër po bëjmë përgatitjen për nisjen e madhe të ‘Giro d’Italia’ pas 48 orësh”, tha Rama.

Kryeministri e cilësoi këtë një event fantastik ku në 200 televizione në mbarë botën do të shfaqin Shqipërinë, Europën e Ballkanit.

“Jam shumë i lumtur që në tre ditë me radhë Shqipëria do të tregojë gjithë shkëlqimin e vetë në sytë e mbarë botës dhe nga ana tjetër që qytetarët shqiptarë të të gjitha moshave, por sidomos fëmijët do të shijojnë xhiron legjendare të Italisë këtu në tokën tonë”, tha Rama.

Burimi ATSH