Agjencia Federale e Prokurimeve Publike e Austrisë, Bundesbeschaffung GmbH (BBG), e ka vlerësuar pozitivisht Organin e Blerjeve Publike (OBP) në Shqipëri, duke e cilësuar atë një model të suksesshëm në fushën e prokurimeve dhe bashkëpunues.

Gjatë një vizite zyrtare në Vjenë, përfaqësuesit e OBP-së u pritën nga ‘BBG Austria’, e cila vlerësoi lart përpjekjet dhe arritjet e OBP-së në vetëm një vit nga themelimi i saj si ndërmarrje shtetërore.

Në deklaratën zyrtare, BBG Austria theksoi se, “ishim shumë të kënaqur dhe të nderuar që ju mirëpritëm në Vjenë. Ky ishte një shkëmbim i vlefshëm për ne, si dhe një mundësi e mirë për të reflektuar mbi sistemet tona të prokurimit publik dhe qasjet ndaj prokurimit të centralizuar dhe bashkëpunues. Ju urojmë shumë suksese në profesionalizimin dhe zhvillimin tuaj të mëtejshëm, dhe jemi të gatshëm të vazhdojmë si partnerë në këtë rrugëtim. Gjithashtu, urime OBP-së për përvjetorin e parë si një ndërmarrje shtetërore e suksesshme”.

Ky vlerësim nga një institucion prestigjioz si BBG Austria është një dëshmi e qartë e përkushtimit dhe profesionalizmit të stafit të OBP-së në përmirësimin e sistemit të prokurimeve të përqendruara në Shqipëri.

Në vetëm një vit, OBP ka arritur të krijojë një strukturë funksionale dhe efikase, duke implementuar praktika të avancuara dhe duke ndërtuar partneritete të forta ndërkombëtare. Ky sukses është një hap i rëndësishëm drejt një administrate publike më transparente dhe të përgjegjshme.

OBP shpreh mirënjohjen e saj për BBG Austria për bashkëpunimin e frytshëm dhe mbështetjen e vazhdueshme, duke shpresuar në projekte të reja dhe suksese të përbashkëta në të ardhmen.

Burimi ATSH