Thanas Sina (1859 – 1934),  i njohur edhe si Athanas Sina, ishte mësues, shkrimtar dhe pjesëtar i Rilindjes Kombëtare nga Postenani, në Leskovik. Gjithashtu Sina ishte dhe anëtar i klubit Bashkimi, që krijoi alfabetin modern të gjuhës shqipe. Më 1887 pas largimit të Pandeli Sotirit nga Korça u emërua drejtor i Mësonjëtores së Korçës.

Thanas Sina lindi në fshatin Postenan afër Leskovikut. Arsimin e mesëm e kreu në gjimnazin “Zosimea” në Janinë, si shumë veprimtarë të tjerë të shquar. Me hapjen e shkollës së parë shqipe më 1887, Thanas Sina ishte mësues në këtë shkollë, në kohën kur ajo fole e arsimit drejtohej nga Pandeli Sotiri. Thanas Sina, Pandeli Sotiri dhe Thoma Avrami ishin ndër mësuesit e parë të Shkollës së Djemve në Korçë.

Shkolla e parë shqipe për vajza, Korçë, 1899. Mësuesit Polikseni Luarasi dhe Thanas Sina, me nxënës. Foto e Kristo Shulit (1858-1938).

Në përfundim të vitit të parë shkollor Pandeli Sotiri largohet për në Stamboll duke ja lënë drejtimin e Mësonjëtorës Thanas Sinës. Ndërsa në përfundim të vitit të dytë shkollor vetë Thanas Sina detyrohet të largohet, pasi shkolla nuk gëzonte më leje nga Porta e Lartë. Pas Thanasit në krye të shkollës vjen Petro Nini Luarasi. Në vitet e mëvonshme Thanas Sina bashkohet me Gjerasim Qiriazin, themeluesin e Vëllazërisë Ungjillore në vitin 1892, në Korçë. Sina ndihmonte Gjerasimin në redaktimin e përkthimeve në shqip të Shkrimit të Shenjtë, gjithashtu shpërndante libra të Shoqërisë Biblike Britanike dhe predikonte ungjillin në gjuhën shqipe.

Ai vazhdoi të kishte lidhje me Shoqërinë Biblike Angleze dhe jepte mësim në Shkollën e Vashave. Në Bullgari ai u emërua drejtor i shoqërisë së Shkrimeve të shenjta, por gjithashtu mundohej të ndihmonte mbi çështjen shqiptare duke përkthyer tekste në gjuhën shqipë. Në vitin 1907, Sina përktheu librin e Sami Frashërit, Shqiptarët, në greqisht ndërsa me ndihmën e Gjergj Qiriazit, rishikoi Dhiatën e Re në dialektin toskë duke e shkruar me alfabetin e ri shqip në vitin 1912. Thanas Sina ndërroi jetë në vitin 1934.