Ministrja e Shëndetësisë dhe Mbrojtjes Sociale, Albana Koçiu ishte e pranishme sot në punimet e konferencës së tretë shkencore mbi sëmundjet e rralla, e organizuar nga Shoqata e Sëmundjeve të Rralla dhe Shërbimi i Laboratorit të Gjenetikës Klinike, QSUNT dhe Universiteti i Mjekësisë.

Në fjalën e rastit, ministrja Koçiu theksoi se po bëhet “një hap i rëndësishëm drejt diagnostikimit dhe trajtimit më të avancuar të këtyre sëmundjeve, falë përmirësimeve të vazhdueshme në sistemin tonë shëndetësor”.

“Me laboratorë të avancuar gjenetikë dhe për herë të parë një Regjistër Kombëtar të Sëmundjeve të Rralla, po mundësojmë kujdes më të mirë dhe trajtim të personalizuar për pacientët. Bashkëpunimi dhe ekspertiza janë kyçe për të ndërtuar një sistem shëndetësor që ofron zgjidhje për të gjithë”, tha Koçiu.

Sipas ministres së Shëndetësisë dhe Mbrojtjes Sociale, “sot është një mundësi shumë e mirë për të diskutuar mes profesionistësh për sëmundjet e rralla. Është konferenca e tretë që organizohet për këtë qëllim dhe kjo tregon edhe për zhvillimin që sektori i shëndetësisë ka marrë ndër këto vite, por edhe për gjithë progresin që është krijuar mes stafeve shëndetësore, nivelit profesional dhe kushteve të punës”.

“Ia kemi dalë që të diskutojmë tashmë për fenomene specifike që shqetësojnë profesionistët e mjekësisë, që shqetësojnë familjarët, të prekurit nga këto sëmundje, por jemi në diskutimin çfarë mund të bëjmë më shumë në mënyrë më të specializuar dhe më të personalizuar”, nënvizoi ajo.

“Shumë më shumë teknika, në dispozicion të profesionistëve me qëllim që puna të bëhet siç duhet, trajtimi të jetë i duhuri dhe rastet e suksesit të jenë të shtuara. MSH është partner, krah jush në çdo moment për të bërë më të mirën për njerëzit, qytetarët, për ju si profesionistë të fushës dhe për të mirën e vendit”, u shpreh Koçiu.

Burimi ATSH