Drejtoria e Përgjithshme e Tatimeve bën të ditur se gjatë vitit 2024, biznesit iu rimbursuan 22 miliardë lekë.

Gjithsej u rimbursuan 1601 subjekte dhe 75% e kërkesave të miratuara u bënë referuar deklarimeve, pa kontroll.

Ndërkohë, edhe koha mesatare e procesimit të kërkesave për rimbursim të TVSH-së ka ardhur në përmirësim të vazhdueshëm.

Nga deri në 160 ditë në vitin 2019, çka sillte stok të detyrimeve të prapambetura, sot koha mesatare ka zbritur në 31 ditë, ndërsa ligji parashikon afat kohor deri në 60 ditë.

“Falë platformës digjitale, rimbursimet e TVSH-së, gjatë vitit 2024, janë bërë brenda mesatarisht 31 ditëve, duke reduktuar kohën e pritjes dhe lehtësuar tatimpaguesit”, bën të ditur DPT.

Administrata Tatimore ka një sistem të dedikuar elektronik aplikimi që nga viti 2022 sa i përket rimbursimit të TVSH-së dhe në të gjitha rastet kur bizneset nuk i nënshtrohen kontrolleve të thelluara, ata përfitojnë brenda afateve rimbursimin e TVSH-së.

Të ardhurat buxhetore për vitin 2025 parashikohen në masën 754,6 miliardë lekë ose 28,8% e PBB. Krahasuar me planin e rishikuar për vitin 2024, të ardhurat totale buxhetore për vitin 2025 parashikohen me rreth 40,6 miliardë lekë ose 0,2% e PBB më shumë.

Të ardhurat nga Tatimi mbi Vlerën e Shtuar, që përfshin TVSH në import dhe brenda vendit, parashikohet të jenë rreth 236 miliardë lekë, ose 22,2 miliardë lekë më shumë sesa viti 2024.

Burimi i rritjes së këtyre të ardhurave shtesë janë rritja nga treguesit makroekonomikë vlerësuar me 10,3 miliardë lekë, nga miradministrimi tatimor në kuadër të zbatimit të Strategjisë me masat e caktuara për 2025, vlerësuar me 6,88 miliardë lekë, nga rritja e importeve të TVSH, rritja e pajtueshmërisë vlerësuar me rreth 5 miliardë lekë.

Për sa i përket rritjes së pajtueshmërisë, Ministria e Financave është shprehur se fokusi kryesor do të jetë me TVSH në sektorë të tillë si ndërtimi, turizmi, tregtia elektronike si dhe gjithë sektorët e tjerë ekonomikë.

Burimi ATSH