Në kuadër të Ditës Ndërkombëtare të Arsimit, ministrja e Shtetit për Rininë dhe Fëmijët, Bora Muzhaqi tha se “në këtë ditë të rëndësishme të dijes dhe zhvillimit për brezin e ri, mbetemi plotësisht të angazhuar për të bërë më shumë për ju, të rinj dhe fëmijë”.

Në një postim në rrjetet sociale, Muzhaqi tha se “mbështetja jonë do të vazhdojë e pakushtëzuar për ju, përmes programeve si Kodimi në Shkolla, Edukimi Financiar, Programi Arte dhe Zeje, Programi i Ekipeve Sportive dhe shumë të tjera, duke kontribuar në mirërritjen, fuqizimin dhe zhvillimin tuaj”, theksoi Muzhaqi.

Dita Ndërkombëtare e Arsimit është një ditë e përvitshme ndërkombëtare kushtuar arsimit, e cila shënohet më datën 24 janar të çdo viti.

Asambleja e Përgjithshme e Kombeve të Bashkuara në takimin e saj të mbajtur më 3 dhjetor të vitit 2018, e shpalli 24 janarin si Ditën Ndërkombëtare të Arsimit, duke përkujtuar rolin që luan arsimi për paqen, përparimin dhe zhvillimin global, si dhe duke riafirmuar me këtë rast edhe faktin se “Arsimi është një e drejtë njerëzore, një e mirë publike dhe një përgjegjësi kolektive”.

Burimi ATSH