Drejtori i përgjithshëm i Policisë së Shtetit, Drejtues Madhor Ilir Proda, u ka kërkuar nga Kakavija të gjitha shërbimeve të Policisë Kufitare angazhim maksimal për të eliminuar çdo pengesë artificiale dhe krijimin e lehtësirave ligjore qytetarëve që përdorin pikat e kalimit kufitar në këto ditë festash.

Në takim ishte i pranishëm edhe ministri i Brendshëm Ervin Hoxha.

“Këto janë momente ku qytetarët tanë kthehen për të festuar Vitin e Ri në shtëpitë e tyre. Këto janë ditë festash dhe për të gjitha shërbimet e Policisë Kufitare kërkohet më shumë angazhim. Të gjithë në detyrë”, u shpreh Proda.

Ai siguroi se asnjë pengesë artificiale nuk do të vijë nga strukturat e Policisë së Shtetit, ndërsa kërkoi bashkëpunim me homologët, që lëvizja të jetë e njëtrajtshme nga të dyja anët e kufirit.

Në bisedën me drejtorin e Policisë Kufitare të Janinës, Proda kërkoi që në pikën e kalimit në palën greke të punohet me të njëjtin numër sportelesh, duke mundësuar lëvizjen e njëtrajtshme dhe eliminimin e radhëve në hyrje apo dalje.

Burimi ATSH