Ministri i Ekonomisë, Kulturës dhe Inovacionit, Blendi Gonxhja deklaroi sot se 25 % e buxhetit të shtetit shkon për mbrojtje sociale.

“Rreth 25 % e buxhetit të shtetit shpenzohet në mënyrë direkte për pagesa në funksion të politikave sociale, pensioneve, skemave mbrojtëse, ndihmës ekonomike, e bonuseve”, tha Gonxhja gjatë fjalës së tij në seancën plenare ku po diskutohet nen për nen projektbuxheti i vitit 2025.

Duke iu përgjigjur deputetit të PD-së, Arbi Agalliu, i cili kërkoi përmes një amendamenti në projektbuxhet, rritjen me 6 herë të indeksimit të pensioneve dhe shtim të fondit për bonusin e fundvitit, Gonxhja theksoi se situata aktuale e pensioneve lidhet shumë me të shkuarën e politikave mbi pensionet që ndikoi direkt mbi ardhmërinë e skemës.

“Vetë skema ka të bëjë me atë që kontribuojmë në vite. Nëse flasim sot për skemën e pensioneve, dekada para kemi situata që kanë ndikuar ndjeshëm në kredibilitetin e skemës në atë që kontribuesit do të duhet të paguanin. Të cilat nuk motivuan formalitetin për qytetarët, punonjësit apo bizneset, pasi pensioni llogaritej mbi një formulë me dy caqe. Njëri me llogaritjen e tre viteve më të ulëta të 10 viteve të fundit dhe jepej 70 % e kësaj mesatareje, ndërsa nuk mund të ishte më i lartë se 24 mijë lekë. Kjo bëri që çdo njeri që dilte në pension të merrte pensione të ulëta”, deklaroi Gonxhja.

Sipas tij, politikat jo të mirëmenduara dhe jo të mirëhartuara të opozitës së sotme kur ishte në pushtet, bënë që sot të përballemi me një pension mesatar jo të duhur e që nuk bën askënd krenar.

(ATSH)