Ministrja e Shtetit për Administratën Publike dhe Antikorrupsionin, Adea Pirdeni tha sot se plot 153 vende vakante janë hapur tashmë në Administratën Publike. Ministrja u shpreh se është hapur thirrja për studentët e ekselencës, që mund të aplikojnë për këto pozicione vakante.

“Nëse ke përfunduar studimet universitare në ciklin e parë ose të dytë të arsimit të lartë me mesatare të ponderuar 9.00 – 10.00 ose ekuivalent me të dhe je diplomuar duke filluar nga viti 2022 e në vijim, mund të aplikosh për t’u bërë pjesë e programit që po transformon administratën tonë publike!

Mundësi punësimi me kontratë të përkohshme 1-vjeçare në pozicione specialist dhe të barasvlershëm në institucionet e administratës shtetërore në të gjithë vendin”, u shpreh Pirdeni në një postim në rrjetet sociale.

Përfshirja e të rinjve në ndërveprim të plotë me punonjësit brenda administratës publike ndikon pozitivisht në zhvillimin e aftësive profesionale të praktikantëve, si dhe forcon lidhjen e tyre me administratën duke e njohur atë më mirë, e rrjedhimisht duke çelur ura të reja kontributesh për administratën europiane që duam.

Këtë vit janë 463 të rinj që kanë nisur praktikën pranë administratës publike, njësive të vetëqeverisjes vendore dhe institucioneve të tjera të pavarura.