Ministrja e Shtetit dhe Kryenegociatorja për Integrimin në Bashkimin Europian, Majlinda Dhuka nënvizoi sot rëndësinë e miratimit të projektrezolutës antikorrupsion, ndërsa theksoi se “punojmë me destinacion të qartë, anëtarësimin e përshpejtuar në BE dhe përmbushjen e kritereve brenda vitit 2030”.

Gjatë fjalës së saj në Kuvend, Dhuka u shpreh se “Shqipëria është në miljet e fundit të rrugës drejt anëtarësimit në BE dhe po punojmë që të përmbushim të gjitha kriteret e anëtarësimit në vitin 2030”.

Dhuka theksoi se “BE i çeli negociatat me Shqipërinë në korrik 2022 si rezultat i progresit të qëndrueshëm me reformat transformuese, veçanërisht me Reformën në Drejtësi”.

“Menjëherë më pas, nga shtatori 2022 Shqipëria nisi dhe zhvilloi me profesionalizëm të vlerësuar nga KE dhe vendet anëtare procesin bazë të përgatitjes së negociatave me BE-në, përkundrejt kritereve dhe standardeve në 36 fusha të qeverisjes publike, ekonomike dhe shoqërisë, një proces i njohur si screening”, tha ajo.

Duke cituar raportin e BE-së për vitin 2023, Dhuka nënvizoi se Shqipëria ka bërë progres në 32 nga 33 kapituj dhe në 7 prej tyre brenda 1 viti është ngritur në shkallën e përmbushjes së kritereve për të qenë vend anëtar.

“Qeverisja e integrimit europian të Shqipërisë është e qëndrueshme dhe progresi i vendosur deri në vitin 2030 është i dukshëm. Ky objektiv është mbajtur i tillë edhe gjatë periudhave të sfidave sociale dhe ekonomike si tërmeti dhe pandemia, sipas vlerësimit të BE-së në raportin e progresit”, shtoi ajo.

Por sipas kryenegociatores, “puna që kemi ende përpara për të përmbushur kriteret për anëtarësim është voluminoze, komplekse dhe gjithëpërfshirëse me të tre pushtetet, ekzekutivin, legjislativin dhe drejtësinë”.

“Vetëm nëse rrisim shpejtësinë dhe cilësinë përmes modernizimit me destinacion anëtarësimin në BE mund të arrihet plotësimi i kritereve në vitin 2030. Puna për plotësimin e kritereve është gjithëpërfshirëse, përfshin institucione në tre pushtetet, tregjet dhe shoqërinë shqiptare. 157 institucione publike dhe rreth 1800 zyrtarë publikë janë të përfshirë drejtpërdrejt. Ndër këto 157 institucione 32 janë institucione të pavarura të cilat janë të përfshira në screeeing me KE-në. Nevoja për të bashkëvepruar së bashku është e madhe”, tha Dhuka.

Kryenegociatorja vlerësoi rolin e pazëvendësueshëm të Kuvendit për të udhëhequr integrimin europian dhe për të siguruar këtë dialog kombëtar.

(Marrë nga ATSH)