Ministri i Brendshëm Taulant Balla, në një komunikim për mediet, tha sot se nuk bie dakord me konstatimin që amnistitë duhet të bëhen më shpesh. Sipas tij, nuk ka amnisti të përvitshme.

Nga Fieri, ku zhvilloi një takim me strukturat e Partisë Socialiste, ministri Balla theksoi se amnistia penale është një shans i dytë që u jepet personave të cilët vuajnë një dënim penal. Balla garantoi se Policia do të monitorojë çdo person që ka përfituar nga amnistia.

“Unë nuk bie dakord me konstatimin që duhen amnisti më shpesh. E vërteta është qeveria shqiptare propozoi këtë vit një amnisti, ekziston një traditë, asnjëherë nuk ka amnisti të përvitshme”, tha Balla.

“Amnistia gjithmonë sjell rikthimin në rrugë të personave të përfshirë në aktivitete kriminale dhe është detyra jonë dhe po ashtu edhe mesazhi që duhet të japim të gjithë atyre që kanë përfituar nga ajo që do ta quaja “dora e ngrohtë” e shoqërisë, amnistia është një dhënie mundësie e dytë që dikush që është marrë aktivitete kriminale, të tërhiqet, në këtë aspekt që duhet t’i venë gishtin kokës nëse nuk duan të rriten përsëri aty ky kanë qenë, duhet që të zbatojnë ligjin dhe të kuptojnë që Policia e Shtetit ka një listë të secilit prej tyre dhe do të monitorohen hap pas hapi për të parandaluar rikthimin e tyre në aktivitetin kriminal”, tha Balla.

(Marrë nga ATSH)