Ministrja e Shtetit për Marrëdhëniet me Parlamentin, Elisa Spiropali deklaroi sot se thellimi i bashkëpunimit dhe partneritetit strategjik mes Shqipërisë dhe SHBA mbetet një nga prioritetet e qeverisë.

Spiropali ishte e pranishme në takimin mes Kryeministrit Edi Rama dhe ndihmëssekretarit të Shtetit për Byronë Ndërkombëtare të Narkotikëve dhe Çështjeve të Zbatimit të Ligjit (INL), Todd D. Robinson.

“Takim i shkëlqyer me ndihmëssekretarin e Shtetit për Byronë Ndërkombëtare të Narkotikëve dhe Çështjeve të Zbatimit të Ligjit (INL), Todd D. Robinson. Mirënjohje për partneritetin, bashkëpunimin e ngushtë dhe angazhimin e përbashkët për forcimin e sundimit të ligjit dhe suksesin e reformës në drejtësi”, u shpreh Spiropali në një postim në rrjetet sociale.

Sipas saj, rezultatet e institucioneve të reja të drejtësisë janë një inkurajim i madh për garantimin e pakthyeshmërisë së reformës drejt kontributit për një shoqëri më të drejtë dhe më të zhvilluar.

“Thellimi i bashkëpunimit dhe partneritetit strategjik mes dy vendeve mbetet një nga prioritetet tona”, theksoi Spiropali.