Kryetarja e Kuvendit, Lindita Nikolla, priti sot paradite në një takim Sekretarin e Përgjithshëm të Ligës Botërore Myslimane, Dr. Mohamed Abdelkarim Al-Iss.

Kryetarja Nikolla nënvizoi se “Shqipëria vlerëson kontributin e Ligës Botërore Myslimane, si një organizatë ndërkombëtare humanitare, e cila promovon miqësinë mes njerëzve dhe përpiqet të zgjerojë urat e dialogut dhe bashkëpunimit me të gjithë kombet, komunitetet, kulturat dhe qytetërimet”.

“Komunitetet fetare dhe besimtarët shqiptarë jetojnë në harmoni, mirëkuptim e tolerancë dhe këto janë ndër vlerat më të çmuara të Shqipërisë, të njohura dhe të vlerësuara botërisht. Mozaiku fetar i Shqipërisë është një pasuri për vendin dhe një model bashkëjetese për të gjitha vendet. Komuniteti mysliman i Shqipërisë, një komunitet progresist dhe tolerant, kontribues për zhvillimin, demokracinë dhe harmoninë fetare në Shqipëri”, vlerësoi Nikolla.

Sekretari i Përgjithshëm i Ligës Botërore Myslimane, Dr. Mohamed Abdelkarim Al-Iss, falënderoi Kryetaren Nikolla për vlerësimet dhe vuri në dukje se Shqipëria është një vend i madh, të cilën e bën të tillë populli shqiptar, për nga toleranca, harmonia dhe mirëkuptimi fetar, prestigji në botën e sotme, shpejtësia e ndryshimeve dhe kapërcimi i sfidave të vështira.

“Harmonia, toleranca dhe bashkëjetesa fetare në Shqipëri kontribuon për ndërtimin e urave të bashkëpunimit mes besimeve fetare, kulturave dhe qytetërimeve”, nënvizoi ai.