Ambasadori britanik, Alastair King-Smith u takua me nxënësit e shkollës së mesme “Ismail Qemali” në Tiranë, për të diskutuar mbi aspiratat e tyre për të ardhmen.

Studentët kanë zhvilluar fushatën e ndërgjegjësimit mbi trafikimin e qenieve njerëzore, #ditembrohem e organizuar nga Fondacioni Together Albania dhe UNICEF.

Ambasadori dhe Përfaqësuesi i UNICEF-it, Murat Sahin iu pergjigjën pyetjeve të studentëve mbi emigracionin, politikën dhe shëndetin mendor dhe i ftuan ata të paraqesin idetë e tyre krijuese për çështje, me të cilat përballet shoqëria shqiptare.

Ambasadori tha: “Mesazhi im për ju dhe te rinjtë e tjerë është: Kërkojeni ju ndryshimin që të mund t’i çoni gjërat përpara. Teksa dëgjoj këndvështrimet dhe vëzhgimet tuaja, kjo na ndihmon t’i sjellim partnerët tanë në këto biseda, në mënyrë që t’i trajtojmë ato së bashku. Unë e vlerësoj shumë talentin tuaj dhe të të rinjve shqiptarë dhe dëshirojmë t’ju ndihmojmë të realizoni ndryshimet pozitive që dëshironi në vendin tuaj.”

Aktiviteti ishte pjesë e programit “Transformimi i Përgjigjes Kombëtare ndaj Trafikimit të Qenieve Njerëzore në dhe nga Shqipëria”, i zbatuar nga UNICEF në Shqipëri me mbështetjen e Qeverisë Britanike.