Viti turistik 2024, në Shqipëri është ‘i rezervuar’ deri tani në mbi 30% më shumë se një vit më parë.

Kështu u shpreh ministrja e Turizmit dhe Mjedisit, Mirela Kumbaro, në panairin “Tourism & Travel Show Albania”, që po mbahet në Tiranë.

“Pas “Fitur Madrid”, një tjetër panair i rëndësishëm në zemër të Tiranës – “Tourism & Travel Show Albania” organizuar me përkushtim nga Iceberg Exhibitions dhe NewDeal Europe që prezanton në mënyrë dinjitoze produktin turistik shqiptar nga 100 ekspozues dhe ofron mundësi të mëdha të shkëmbimeve të përvojave dhe kontakteve me blerësit ndërkombëtarë të interesuar për ofertën shqiptare nën moton e turizmit të qëndrueshëm e në respekt me mjedisin”, tha Kumbaro.

Ministrja theksoi se, Shqipëria është kthyer në një destinacion trend dhe se zhvillimi i saj turistik po njeh përparim të dukshëm në rajon dhe më gjerë.

“Mbi 400 takime mes bizneseve gjatë 2 ditëve të panairit, premtojnë eksperienca më të suksesshme për vitin turistik 2024, “i rezervuar” tashmë në mbi 30% më shumë se një vit më parë dhe këtë e raportojnë vetë turoperatorë”, tha Kumbaro.

(Marrë nga ATSH)