Ministrja e Bujqësisë dhe Zhvillimit Rural, Anila Denaj priti sot në një takim Të Ngarkuarin me Punë në Ambasadën e Shteteve të Bashkuara të Amerikës në Tiranë, David Wisner dhe drejtuesen e USAID në Shqipëri, Mischere Kawas.

Denaj bëri të ditur se gjatë takimit u diskutua mbi projektet e USAID-it për forcimin e zinxhirit të vlerës dhe rritjen e bashkëpunimit midis bizneseve shqiptare dhe atyre amerikane.

“Kënaqësi të prisja në takim të Ngarkuarin me Punë në Ambasadën e Shteteve të Bashkuara të Amerikës në Tiranë, z. David Wisner dhe drejtuesen e USAID në Shqipëri, znj. Mischere Kawas. Diskutuam mbi projektet e USAID për forcimin e zinxhirit të vlerës, mundësitë e bashkëpunimit mes bizneseve shqiptare dhe ato amerikane në fushën e bujqësisë, për shkëmbimin e eksperiencës dhe produkteve në shërbim të rritjes ekonomike të fermerëve.”, shkran ministrja Denaj në një postim të saj në rrjetet sociale.

Bujqësia është një ndër sektorët e rëndësishëm në ekonominë e vendit, e cila kontribuon ndjeshëm në Prodhimin e Brendshëm Bruto dhe punëson rreth 40 % të forcës së përgjithshme të punës.