Kryeministri Edi Rama deklaroi sot se, mbi 80 mijë turistë francezë vizituan Shqipërinë këtë vit.

Në ceremoninë e mbajtur në Pallatin e Brigadave me miqtë e Francës, në nderim të Presidentit francez Emmanuel Macron, Rama u shpreh se, “në historinë e saj të gjatë Shqipëria ka parë të kalojnë në truallin e saj dhe të përzihen me tallazet e saj turma të panumërta francezësh, të njohur dhe më pak të njohur”.

“Në kohët e largëta dhe më pak të gëzuara ishin normandët, kryqtarët. Në kohët më të hershme dhe pak më të gëzuara, turistët, ngazëllimi i të cilëve për brigjet tona, peizazhet, kulturën tonë, vetëm sa ka filluar. Më shumë se 80 mijë vetëm këtë vit, gjë që na motivon të vazhdojmë përpjekjen e përbashkët për të afruar dy vendet tona duke intensifikuar shkëmbimet.

Kjo për t’ju thënë rëndësinë që ne i japim ekspertizës franceze në këtë fushë, bashkuar me asistencën më specifike që Franca propozon t’i ofrojë Shqipërisë në kuadrin e negociatave të anëtarësimit në BE”, theksoi Rama.

Gjithashtu, theksoi kreu i qeverisë, “për t’ju thënë rëndësinë e një lidhjeje akoma më të fortë dhe të përhershme, përmes fluturimeve direkte mes Francës dhe Shqipërisë që e dëshirojnë kaq shumë qytetarët tanë”.

“Ndonëse Shqipëria ka pritur francezë të interesuar që ta njihnin, megjithatë deri më sot ajo nuk ka pritur kurrë në kuptimin e mirëfilltë të fjalës, Francën. Sigurisht një prani, sidomos ajo e Francës në një vend si i yni, nuk mund të reduktohet vetëm me vizita zyrtare të nivelit të lartë. Megjithatë ajo merr gjithë kuptimin e saj, gjen një forcë domethënëse dhe ecën përpara vetëm kur kryetari i shtetit që e mishëron jashtë dhe i jep impulsin, i lë në të njëjtën kohë gjurmën dhe i jep tonin”, tha Rama.

Në fakt, nënvizoi Rama, “mjafton të shohim programin e kësaj vizite të shkurtër, por intensive, për të kuptuar hovin e jashtëzakonshëm të marrëdhënieve tona dypalëshe në fusha të ndryshme si ekonomia dhe zhvillimi qëndrueshëm, siguria apo ajo që unë e quaj kultura high-tech, nëse kam parasysh bashkëpunimin që hapet në fushën e audio-vizuales, kinemasë apo artit bashkëkohor”.

“Duke Ju pritur sot, zoti President, Shqipëria pret sot Francën me krenari, me miqësi, me shpresë, madje do të thoja, jo pa emocion. Nuk është emocioni i një momenti, është ndjesi e thellë, që i ka rrënjët e veta në histori”, iu drejtua Rama presidentit francez Macron.

Marrë nga ATSH