Më 15 Gusht, Ambasadori i Japonisë në Shqiplri, Takada Mitsuyuki vizitoi bibliotekën publike “Marin Barleti” në Shkodër dhe mori pjesë në ceremoninë e dhurimit të librave të ofruar nga “Nippon Foundation” dhe “Tokyo Foundation for Policy Research” përmes projektit “READ JAPAN PROJECT”.

Me këtë donacion, 150 libra në lidhje me Japoninë, të shkruara në anglisht, iu dorëzuan bibliotekës. Ambasadori Takada, në fjalën e tij, u uroi studentëve dhe qytetarëve shkodranë të mund të thellojnë njohuritë e tyre për Japoninë përmes librave.

Përgjegjësja e bibliotekës, znj. Magdalena Haxhi, shprehu mirënjohje për dhurimin e librave për bibliotekën dhe dëshirën për shkëmbime të mëtejshme kulturore mes dy vendeve në të ardhmen.