Ministrja për Evropën dhe Punët e Jashtme, Olta Xhaçka zhvilloi sot një takim me Sekretarin e Jashtëm të Mbretërisë së Bashkuar, James Cleverly.

Xhaçka u shpreh se, me Cleverly-n diskutuan rreth bashkëpunimit dypalësh në një sërë fushash përfshirë këtu migracionin, bashkëpunimin ekonomik dhe investimet britanike në Shqipëri.

Xhaçka gjithashtu shprehu mirënjohje ndaj Sekretarit James për angazhimin e tij personal në zhvillimin e këtij bashkëpunimi.

“Një takim shumë i mirë me Sekretarin e Jashtëm të Mbretërisë së Bashkuar, James Cleverly përgjatë Konferencës për Rimëkëmbjen e Ukrainës (URC2023). Diskutuam rreth bashkëpunimit dypalësh në një sërë fushash përfshirë këtu migracionin, bashkëpunimin ekonomik dhe investimet britanike në Shqipëri. Mirënjohje Sekretarit James për angazhimin e tij personal në zhvillimin e këtij bashkëpunimi”, shkroi Xhaçka në një postim në rrjetet sociale.

Ministrja për Evropën dhe Punët e Jashtme, Olta Xhaçka, po merr pjesë në Konferencën e Rimëkëmbjes së Ukrainës 2023 (URC23), e cila organizohet bashkarisht nga Mbretëria e Bashkuar dhe Ukraina, në datat 21-22 qershor 2023, në Londër.

Konferenca është një ngjarje e profilit të lartë, e cila do të bashkojë qeveritë, shoqërinë civile dhe sektorin privat për të treguar mbështetje për rimëkëmbjen dhe prosperitetin ekonomik të Ukrainës.

Në këtë konferencë, ku Shqipëria përfaqësohet nga MEPJ, Olta Xhaçka, marrin pjesë 60 vende, dhe 40 prej tyre do të përfaqësohen nga krerët e shteteve dhe ministrat e jashtëm.