Forma legjendare dhe modele epike të ndërthurura në 265 makina klasike zbukuruan Tiranën më 13-16 maj, në sheshin “Italia”, për të sjellë në kryeqytetin shqiptar një atmosferë tipike Retro.

Kryeministri Edi Rama ndau sot në rrjetet sociale pamje nga turi ‘Tour Amical’, i cili zhvillon edicionin e 19-të të tij me destinacion Sofje – Prishtinë – Shkup – Tiranë – Budva – Dubrovnik.

“600 të apasionuar me 265 mjete klasike nga Belgjika zbukuruan Tiranën me një atmosferë magjike për 4 ditë. Retro Albania mirëpriti turin e 19-të të ‘Tour Amical’, i cili përzgjodhi Shqipërinë si një prej vendtakimeve kryesore të të pasionuarve dhe nostalgjikëve të “mjeteve me shpirt””, shkroi Rama.

Gjatë ditëve të turit, qytetarët e pasionuar pas makinave, panë nga afër koleksionin e mjeteve klasike.

‘Tour Amical’ e cilësoi Tiranën si një qytet po aq të këndshëm sa Berlini, rrënojat dhe historitë po aq magjepsëse sa ato të Romës, kafenetë dhe baret, komode si në Amsterdam dhe çmimet, edhe më të favorshme se Krakovi.