Ministri i Mbrojtjes Niko Peleshi priti sot në takim kryetaren e Komisionit të Mbrojtjes dhe Punëve të Jashtme të Senatit italian, Stefania Craxi.

Në një postim në rrjete sociale, Peleshi ka vlerësuar mbështetjen që Italia i jep Shqipërisë në rrugën e integrimit euroatlantik.

Ai tha se në fokus të takimit ishin sfidat me të cilat përballet rajoni i Ballkanit Perëndimor dhe përkushtimi i Shqipërisë për integritetin territorial të Kosovës.

“Takim miqësor me Stefania Craxi, kryetare e Komisionit të Mbrojtjes dhe Punëve të Jashtme të Senatit italian. Diskutuam për lidhjet e forta mes Shqipërisë dhe Italisë, si dhe sfidat me të cilat përballet rajoni dhe rikonfirmova përkushtimin e vendit tonë për sovranitetin dhe integritetin territorial të Kosovës. Shpreha mirënjohjen time për mbështetjen e Italisë në rrugën e Shqipërisë drejt integrimit euroatlantik duke marrë garancinë e znj. Craxi se Italia do të vazhdojë të mbështesë pa u lodhur Shqipërinë dhe të punojnë për sigurinë në Ballkanin Perëndimor”, shkruan Peleshi. /ATSH