Komisioneri Shtetëror i Zgjedhjeve regjistroi sot në zgjedhje koalicionin “Bashkë Fitojmë”, pa grupin e Rithemelimit përfaqësuar nga Berisha.

Në lidhje me regjistrimin e koalicionit “Bashkë Fitojmë”, përfaqësuesi i PD-së Indrit Sefa tha se duhet rrëzuar kërkesa e këtij koalicioni sepse janë përdorur simbolet e PD-së në mënyrë të paautorizuar.

“Unë si përfaqësues i PD-së, konfirmoj se Partia Demokratike nuk ka bërë asnjë koalicion. Po ashtu, ju konfirmoj që është përdorur emri, karakteristika dhe logo e PD-së nga persona të paautorizuar dhe të palegjitimuar. Kërkesë e domosdoshme është depozitimi i marrëveshjes. Komisioneri duhet të konstatojë se kjo marrëveshje është bërë në mashtrim të ligjit dhe të zgjedhësve, Partia Demokratike nuk ka asnjë kërkesë për koalicion”, tha Sefa.

“Së dyti, kjo kërkesë duhet rrëzuar për sa kohë që marrëveshja është një dokumet i domosdoshëm për paraqitjen në KQZ. Kjo marrëveshje nuk është e ligjshme, ndaj kërkojmë rrëzimin e kërkesës sepse në të është shprehur vullneti për Partinë Demokratike nga persona të paautorizuar”, tha ai.

Komisioneri Shtetëror i Zgjedhjeve Ilirjan Celibashi tha “ne jemi përballë të njëjtës situatë sikurse ishte ajo e pragzgjedhjeve të 6 marsit, ku pak a shumë ishte e njëjta kërkesë”.

“Do ta regjistrojmë vetëm me tre parti politike, Partia e Lirisë, Partia Demokristiane dhe Partia për të Bashkimi për të Drejtave të Njeriut me shkronjat “BF”, theksoi Celibashi.