Sekretari i Përgjithshëm i NATO-s, Jens Stoltenberg në konferencën e përbashkët me Presidentin Bajram Begaj në selinë e NATO-s në Bruksel, vlerësoi kontributin e Shqipërisë në NATO dhe rolin e saj për stabilitetin në rajon.

Në fjalën e tij, Stoltenberg tha se “Shqipëria është një aleat i vyer me një historik të gjatë për mbështetjen e aleatëve të NATO-s dhe partnerëve të saj”.

“Ju kontribuoni për Forcat Shumëkombëshe të NATO-s në Letoni dhe Bullgari duke ndihmuar për të penguar ndonjë agresion të mundshëm. Forcat tuaja ndihmojnë dhe në misionin paqeruajtës në Kosovë dhe në misionin për ndërtimin e kapaciteteve në Irak. Muajin e shkuar shteti juaj iu përgjigj me shpejtësi pasojave të tërmetit shkatërrues në Turqi, duke dërguar atje ekipe shpëtimi dhe ekipe mjekësore”, – tha ai.

Në vijim, Stoltenberg theksoi se Shqipëria luan një rol të rëndësishme për stabilitetin në Ballkanin Perëndimor, i cili është një rajon me rëndësi strategjike për NATO-n.

“Mirëpres gjithashtu rolin aktiv për promovimin e politikës së dyerve të hapura të NATO-s. Përgëzoj Shqipërinë për ratifikimin e protokollit të pranimit për Finlandën dhe Suedinë, kaq shpejt. Kjo demonstron në vetvete se dyert e NATO-s janë të hapura dhe se ne mbrojmë të drejtën e çdo kombi për të zgjedhur rrugëtimin e vet. Të gjitha këto kontribute tregojnë angazhimin e fortë të Shqipërisë ndaj aleancës. Edhe NATO nga ana e vet është angazhuar ndaj Shqipërisë. Aleatët ishin me ju pas sulmeve kibernetike të vitit të shkuar dhe ekspertët e NATO-së ofruan mbështetje urgjente”, – tha ai.

“Ne diskutuam së bashku luftën brutale të agresionit kundër Ukrainës nga Rusia. Presidenti Putin po ndërmerr ofensiva të reja dhe përgjigjja jonë duhet të jetë e tillë që t’i japim Ukrainës çfarëdo gjëje që asaj i duhet për të fituar. Aleatët po rrisin mbështetjen e saj dhe mirëpres angazhimet e Shqipërisë në këtë ndihmë. Ne do të vazhdojmë të mbështesim këtë vend për aq kohë sa duhet”, – tha Stoltenberg.

Gjithashtu, Stoltenberg tha se diskutoi me Presidentin Begaj edhe angazhimin e NATO-s në Ballkanin Perëndimor.

“Ramë dakord për rëndësinë e praninë e NATO-s në rajon, përfshirë dhe misionin paqeruajtës në Kosovë si dhe zyrat në Sarajevë dhe në Beograd. Gjithashtu folëm për rritjen e mbështetjes për Bosnjë-Hercegovinën sipas nevojave të saj. Ne diskutuam dhe për progresin e bërë nga Beogradi dhe Prishtina për bisedimet e lehtësuara nga BE dhe presim që të kemi angazhime konstruktive gjatë javëve në vijim. NATO mbetet e angazhuar për stabilitetin e sigurisë në Ballkanin Perëndimor dhe do të vazhdojmë të mbështetemi në bashkëpunimin e Shqipërisë”, – theksoi Stoltenberg. /ATSH