Bashkia Elbasan në kuadër të projektit BeMed+ dhe me metodologjinë ndërkombëtare të OSPAR Commission po identifikon burimet reale të ndotjes përgjatë lumit Shkumbin.

Ministri i Mjedisit, Sofjan Jaupaj në një postim në rrjetet sociale tha se “monitorimi i mjedisit po kthehet në një proces shkencor dhe të matshëm në bashkinë Elbasan”.

“Çdo mbetje e analizuar është një e dhënë konkrete për politika më të forta mjedisore teksa ky proces është njëkohësisht trajnim dhe ndërgjegjësim, me përfshirjen e të rinjve që matin, analizojnë dhe kontribuojnë për zgjidhje të qëndrueshme për qytetin e tyre”, theksoi Jaupaj.

Sipas tij, pas identifikimit të burimeve reale të ndotjes do të ndërhyhet drejtpërdrejt aty ku lind problemi.

Kryebashkiaku i Elbasanit, Gledian Llatja tha se “sot kemi filluar një model të ri të monitorimit të brigjeve tona lumore, pikërisht për të identifikuar arsyet kryesore të ndotjes që kemi dhe për t’i konstatuar ato në pika të caktuara në çdo kohë”.

Kjo, shtoi Llatja, do të na mundësojë monitorimin e vazhdueshëm, marrjen e masave përkatëse për evidentimin dhe goditjen e personave që ndotin mjedisin dhe lumenjtë.

Nxënës dhe studentë janë angazhuar aktivisht në matjen, analizimin dhe interpretimin e të dhënave, duke u bërë pjesë e drejtpërdrejtë e zgjidhjeve të qëndrueshme për qytetin e tyre.

Përfshirja e brezit të ri forcon kulturën e përgjegjësisë mjedisore dhe ndërton kapacitete afatgjata për komunitetin.

Çdo mbetje plastike e evidentuar nuk konsiderohet thjesht si mbeturinë, por si një e dhënë konkrete shkencore, që ndihmon në hartimin e masave të drejtpërdrejta dhe efektive ndaj ndotësve.

Ky proces shërben njëkohësisht si një laborator i hapur mjedisor dhe si një platformë edukimi për të rinjtë.

Nisma zbatohet në kuadër të programit BeMed+, me mbështetjen e Beyond Plastic Med, IUCN dhe Surfrider Foundation Europe, si dhe organizatës INCA Albania.

Përmes kësaj nisme, bashkia Elbasan konfirmon angazhimin e saj të qartë për politika mjedisore të bazuara në të dhëna dhe për veprime konkrete në mbrojtje të mjedisit, duke e vendosur qytetin në një rrugë të qëndrueshme zhvillimi të gjelbër.

Marrë nga ATSH