Ministri i Turizmit, Kulturës dhe Sportit, Blendi Gonxhja në fjalën e mbajtur sot në Asamblenë Zgjedhore të FShF-së, tha se deri në fundin e këtij viti do të jenë gati aktet nënligjore për Ligjin e Sponsorizimeve dhe nga viti 2027 ai do të jetë në fuqi, duke i dhënë më shumë frymëmarrje biznesmenëve që investojnë në sport.

Ligji “Për sponsorizimet në sport në Shqipëri”, i bazuar kryesisht te Ligji nr. 7892, datë 21.12.1994, i ndryshuar, synon nxitjen e financimit privat përmes lehtësive tatimore, duke u mundësuar sponsorëve në futboll, basketboll, volejboll etj., zbritje nga tatimfitimi, deri në 15-20% për sportet e përhapura.

“Doja të theksoja lajmet e mira dhe t’i rikonfirmoja. Javën e shkuar mbyllëm konsultimin publik sa i përket një ligji shumë të rëndësishëm që do hapë një horizont shumë të madh e të gjerë, të shumëpritur, që është ai i sponsorizimeve. Theksoj që vendin e parë e zë futbolli, për sa i përket forcës që ka për promovimin dhe forcën që ka për kthimin e investimit”, u shpreh ministri Gonxhja.

Ligji i sponsorizimit do të sjellë më shumë shikueshmëri dhe do të japë për ata që do të investojnë në këtë sport një promovim dhe shikim që përmes futbollit është shumë herë më i madh.

Ministri tha se, nga fundi i këtij viti mbyllen aktet nënligjore dhe proceduriale, duke “qepur” gjithë sistemin e aplikimit dhe vetëdeklarimit të mënyrës se si do të funksionojë ligji i sponsorizimit.

“Është e pamundur të mendojmë se mund t’ia dalim vetëm me fonde buxhetore, kështu që po bëjmë ç’është e mundur për formula që deri sot nuk kanë qenë, kjo në mbështetje të sportit. Kjo gjë do të vijë si një paketë që do të përfshijë edhe artin, kulturën, spektaklet, gjithë ngjarjet ndërkombëtare, sepse kjo është një levë ekonomike për vendin, dhe pse jo edhe turizmin”, tha Gonxhja.

Marrë nga ATSH