Shefja e politikës së jashtme të Bashkimit Evropian, Kaja Kallas, e ka cilësuar formimin e qeverisë së re të Kosovës si një zhvillim inkurajues, pas më shumë se një viti bllokim politik.

Kallas uroi kryeministrin Albin Kurti, derisa tha se ky është një moment i ri për të avancuar marrëdhëniet mes BE-së dhe Kosovës, si dhe dialogun ndërmjet Beogradit dhe Prishtinës.

“Ky është një moment i ri për të avancuar marrëdhëniet BE-Kosovë dhe dialogun Beograd-Prishtinë. Jam gati të organizoj një takim të nivelit të lartë së shpejti. Tani ajo që ka rëndësi është që të ecë me shpejtësi me reformat. Kjo është mënyra më e shpejtë për të zhbllokuar mbështetjen e BE-së me vlerë qindra miliona euro dhe për të pasur përparim në rrugën e saj drejt BE-së”, ka shkruar ajo në “X”.

Kuvendi i Kosovës miratoi mbrëmë me 66 vota për, 49 kundër dhe asnjë abstenim qeverinë Kurti III.

Pro qeverisë Kurti votuan deputetët nga Lëvizja Vetëvendosje dhe komunitetet joserbe. Kundër formimit të qeverisë Kurti votuan deputetët e PDK-së, LDK-së, AAK-së dhe Listës Serbe.

/Kosovapress/