Ministri i Shtetit për Pushtetin Vendor, Ervin Demo u shpreh sot se bashkitë në vend janë vlerësuar për planet e tyre sociale, përmes Grantit të Performancës.

Deklarata e Demos, erdhi gjatë aktivitetit “Fondi Social 2026 – Garanci për Qëndrueshmërinë e Shërbimeve për Mirëqenien e Qytetarëve”, ku të pranishëm ishin Kryeministri Edi Rama, ministrja e Shëndetësisë dhe Mirëqenies Sociale, Evis Sala, ambasadori i Bashkimit Europian, Silvio Gonzato dhe përfaqësuesi i zyrës së UNICEF-it në Shqipëri, Murat Sahin.

Demo tha se “bashkia është pika ku shteti takohet çdo ditë me qytetarin”.

“Me fillimin e mbështetjes së bashkive përmes Fondit Social ne krijuam dallëndyshet e para dhe ajo që u konstatua është qëndrueshmëria. Për vite të tëra dhe dekada në Shqipëri përmes mbështetjes së donatorëve, bashkitë arrinin që të krijonin kapacitete lokale për të trajtuar çështje me rëndësi të veçantë, sidomos për qytetarët. Por sfidat financiare, dhe mungesa e kapaciteteve i bënte bashkitë që të mos garantonin qëndrueshmërinë e këtyre projekteve”, tha Demo.

Sipas Demos, një ndër elementët kryesor të Fondit Social është garantimi i qëndrueshmërisë të të gjitha shërbimeve lokale.

“Bashkitë me fuqizimin e tyre financiar, që tashmë evidentohet në territor do të vazhdojnë dhe ta mbështesin shërbimin social duke qenë prioritet i politikave sociale. Planet sociale kanë qenë një nga pikat ku bashkitë janë vlerësuar me Grantin e Performancës dhe për vitin 2026 ne do të vlerësojmë cilësinë e shërbimit që bashkitë japin në territor përmes shërbimeve sociale, sa i përket përgjigjes që duhet t’i japin kërkesave të qytetarëve”, vijoi ai.

Ministri Demo nënvizoi faktin se sfidat që bashkitë kanë janë të shumta, por Fondi Social është aty, bashkë me mbështetjen e qeverisë.

“Rritja me 17% e Fondit Social për vitin 2026 është tregues i qartë që në territor ka nevoja dhe qeveria duhet të luajë rolin e saj. Prezenca e kryetarëve të bashkive tregon motivimin e tyre që shërbimi social do të kthehet në një prioritet financiar për buxhetet lokale”, përfundoi Demo.

/Marrë nga ATSH