Instituti i Shëndetit Publik zhvilloi sot një aktivitet sensibilizues në pedonalen e Tiranës, në bashkëpunim me Shoqatën e Diabetit, ku qytetarët patën mundësinë të marrin këshilla mbi parandalimin dhe menaxhimin e diabetit, si dhe kryen matjen e glicemisë falas.

Në aktivitet të organizuar në Ditën Botërore të Diabetit mori pjesë edhe nënkryetarja e bashkisë Tiranë, Anuela Ristani, e cila vlerësoi rëndësinë e bashkëpunimit mes institucioneve dhe komunitetit për përmirësimin e kujdesit ndaj personave me diabet.

“Qëllimi ynë është të rrisim ndërgjegjësimin për kontrollin e rregullt, stilin e shëndetshëm të jetesës dhe diagnostikimin e hershëm, hapa kyç për të shmangur komplikacionet dhe për të jetuar më shëndetshëm”, theksoi ISHP në një postim në rrjetet sociale.

ISHP falënderoi qytetarët që u bashkuan në këtë aktivitet dhe Shoqatën e Diabetit për mbështetjen dhe institucionet vendore për angazhimin.

Sipas të dhënave të Organizatës së Kombeve të Bashkuara, prevalenca globale e diabetit është pothuajse dyfishuar që nga viti 1980, duke u rritur nga 4,7% në 8,5% në popullatën e rritur.

Organizata Botërore e Shëndetësisë ka zgjedhur si temë të këtij viti “Diabeti në fazat e jetës”, temë e cila i njeh kujtdo që jeton me diabet, të drejtën që të ketë akses në kujdesin e integruar, mjedise mbështetëse dhe politika që promovojnë shëndetin, dinjitetin dhe vetëmenaxhimin.

Burimi ATSH