Zëvendëskryetari i Komisionit të Prokurimit Publik, Fiorent Zguro, raportoi sot për veprimtarinë e Komisionit të Prokurimit Publik për vitin 2024.

Zguro tha se ka një ulje të numrit të vendimeve të ankimuara pranë Gjykatës Administrative, nga 4,4% të vendimeve të ankimuara në vitin 2023, në 4% të vendimeve të ankimuara në vitin 2024, si dhe një rritje e numrit të vendimeve të lëna në fuqi nga Gjykata për vendimmarrjen e Komisionit të Prokurimit Publik.

Zguro nënvizoi se gjatë vitit 2024 kanë vijuar përpjekjet e institucionit në drejtim të përmirësimit të ofrimit të shërbimeve në rrugë digjitale.

“285 më shumë ankesa janë paraqitur në vitin 2024 krahasuar me vitin 2023, ndërkohë mbi 341 operatorë ekonomikë unikë kanë paraqitur ankesa. Nga këto të fundit 1/3 janë operatorë ekonomikë tërësisht të rinj në sistemin e rishikimit administrativ. Falë digjitalizimit janë kursyer mbi 3.762.180 lekë si kosto të shpenzimeve administrative për paraqitjen e ankesave pranë autoriteteve kontraktore dhe operatorëve ekonomikë”, tha ai.

Zguro theksoi se Komisioni i Prokurimit Publik ka vijuar angazhimin në kuadër të detyrimeve si vend anëtar dhe themelues i rrjetit të Organeve Shqyrtuese të Evropës Juglindore, me pjesëmarrjen aktive në veprimtaritë e organizuar nga rrjeti, si edhe me pjesëmarrjen aktive në Rrjetin e Organeve Shqyrtuese të shkallës së parë të Bashkimit Evropian.

Sipas Zguros “Inteligjenca Artificiale do të luajë një rol të rëndësishëm në proceset e prokurimit dhe vetë KPP është duke analizuar mundësinë e përfshirjes së saj në procesin e rishikimit administrativ me fokus gjatë vitit 2025.

“Ky është një moment i rëndësishëm dhe ne mbetemi të përkushtuar të jemi pjesë e zgjidhjeve pozitive dhe konstruktive duke punuar me të gjitha grupet e interesit për t’u siguruar që ky moment në kohë të mos kalojë pa bërë ndryshime thelbësore dhe pozitive. Komisioni i Prokurimit Publik, mbetet i angazhuar për të vijuar përkushtimin ndaj të gjithë grupeve të interesit, për një sistem rishikimi administrativ transparent dhe të qëndrueshëm”, deklaroi Zguro.

Burimi ATSH