Rilindja e Liceut Franko-Shqiptar në Korçë si dhe ofrimi i programeve nga Universiteti i Teknologjisë së Compiègne në Universitetin Politeknik të Tiranës janë dy bashkëpunime me Francën që po projektohen në fushën e arsimit.

Rreth këtyre dy projekteve u fokusua edhe takimi i sotëm koordinues mes ministres së Arsimit, Mirela Kumbaro dhe ambasadores franceze Catherine Suard.

Kumbaro u shpreh se projektet do të shënojnë një hap të madh për arsimin dhe inovacionin në Shqipëri.

Po ashtu, projektet do të krijojnë mundësi të reja për të rinjtë shqiptarë dhe ndërkombëtarë, për një arsim bashkëkohor dhe kërkim shkencor.

Ministrja njoftoi se së bashku me ambasadorën Suard do të jenë së shpejti në Korçë për të ndjekur projektin e Liceut Franko-Shqiptar të Shkencave dhe Inovacionit.

Tashmë, projekti i Liceut Francez ka marrë udhë pasi eksperti i qeverisë franceze, Jérôme Lebars është atashuar në institucionin e Prefekturës Korçë, për të ndjekur nga afër projektin e liceut.

Ky projekt është vazhdë e traditës së miqësisë më të mirë mes Shqipërisë e Francës dhe do të zgjerojë hapësirën për një perspektivë të re për shumë të rinj të këtij qarku e më gjerë, të cilët pas studimeve në Liceun Francez do të mund të zgjedhin një shkollë elitare për arsimin e tyre të mëtejshëm.

Marrë nga ATSH